السلام عليكم ورحمه الله وبركاته
ازيكم يا جماعه أسفين أخرنا عليكم الجزء دة ولكن إعزرونا رمضان وانتم عارفين الصيام بقى
المهم
ندخل فى الموضوع
زى ما إحنا عارفين إن ممكن انك تكون ماشى فى الشارع وتشوف حرامى بيسرق حاجة أو أى واحد بيعمل حاجة مش مظبوطة واحنا سبق وقلنا ان القبض والتفتيش بيكونوا بواسطة رجال الشرطة أو اى واحد من المجموعه اللى قولنا عليها
طيب انا الوقتى شوفت واحد بيعمل جريمة فى الشارع هعمل ايه ؟ همسكة ولا أسيبة ؟ طيب انا لو مسكته ومعاه سكينة أخدها منه ولا أسيبها معاه زى ما هو ؟ لو رمى المسروقات اللى معاه أجبها ولا مليش دعوة طيب فى المركز كل شوية هيجوا ياخدونى وأنا راجل مش فاضى كل يوم أروح المحكمة وأقسام الشرطة بصراحه مبحبهاش أعمل ايه شوفلى حل ؟
دى كلها أسئلة فى دماغنا طيب تعالوا نشوف هنعمل ايه فى كل الحاجات دى
أولا لازم نعرفكم ان فى حاجة إسمها تسليم الاهالى ودة يعنى ان لو الناس شافت واحد بيرتكب جريمة لازم علينا إننا نحاول نمسكه لاننا بردك لو معملناش كدة الجرايم هنتنشر ومش هنعرف نحافظ على البلد فأى واحد نشوفه بيعمل جريمة نمسكة ونودية أقرب قسم شرطة أو لاقرب أمين شرطة أو ظابط بدون ما نفتشه زى ما إحنا عارفين
طيب يعنى من حق الناس اللى فى الشارع تقبض على حد متلبس بجريمة
لا طبعا إحنا سبق وقلنا إن القبض والتفتيش من سطلة النيابة العامة أو رجال الشرطة إنما اللى الناس تعملة إنها تمسك المجرم وتمسك منه السلاح اللى معاه أو الحاجات اللى سرقها وهو دة اللى اسمة تسليم الاهالى يعنى انت القانون إداك الحق دة فى انك تمسكة وتسلمه لاقرب قسم شرطة أو أقرب أمين شرطة أو لحد ما تتصل بالشرطة تيجى تاخده
طيب إحنا ماسكين واحد ممكن نفتشه ولا مش ممكن ؟
لا طبعا مش من حق حد يفتشه غير المختصين بكدة إنما لو كان معاه سلاح تاخده منه وتتحفظ عليه معاه سكينة مخبيها تطلعها لانه ممكن يعورك بيها أو يجرحك معاه مسدس أى حاجة من دى إنما تفتيش ممنوع للناس إنما التفتيش يكون بواسطة رجال الشرطة لما يجوا وياخدوة أو لما يسلمة الناس لرجال الشرطة
طيب ليه الشرطة أحيانا بتعمل محاضر الشرطة بتاعه السرقات على انها تسليم أهالى
أقولك أحيانا بيكونوا مسكوا الحرامى وضربوة جامد وأثار الضرب ظاهره عليه وواضحه جامد ولو عرضوة على النيابة كدة النيابة هتعمل لهم مشكلة فيقوموا يكتبوا المحضر على انه تسليم أهالى فمش معقول النيابة هتعمل محاضر لكل أهل المنطقة علشان تعرف مين اللى ضربة ( يعنى يتفرق دمه بين القبائل )
طيب انا لما أمسك الحرامى مفيش عليا أى مسؤلية
لا طبعا مفيش أى مسؤلية انما انت بتكون شاهد عليه بس فى الجريمة اللى هو ارتكابها
ما انت عارف انهم فى القسم بيخلوا الواحد قاعد كتير ومش بيخلصوا شغلهم وإحنا ناس ورانا أشغال
لو كل واحد عمل زيك كدة يبقى مفيش مجرم هيتعاقب ولا مجرم هياخد جزاءوة يبقى كل واحد هيعمل جريمتة وهو مش خايف لانه عارف إن مفيش حد هيمسكة ولاحد هيعمل معاه حاجة ولو كل واحد علشان هيتعطل شوية هيقول أنا مش رايح القسم يبقى الشرطة مش هتعمل حاجة لواحدها يا جماعه إحنا بردك لازم نساعدها مينفعش اننا نسبها كدة لازم نساعد ومنهربش من المساعده يعنى نروح نشهد ونقول الشهاده بتاعتنا علشان بلدنا تنضف من الحرامية والأشقياء دول والبلد تبقى كويسه
طيب انا لو مش عاوز أشهد هيحصل ايه
انت مفيش حد هيقدر يضرك انك مش هتشهد بس إعرف ان ممكن أمك تكون مكان اللى اتسرقت أو أختك أو اخوك أو ابوك وإنك ممكن تكون انت مكانهم فلو كل واحد اتنصل من الشهاده يبقى هنخلى المجرمين يعملوا اللى هم عاوزينه والشرطة بردك مش هتعرف تعمل كل حاجة زى ما إحنا قلنا يبقى لازم كلنا نقوم بدورنا فى إننا نساعدهم ولما نشوف حاجة زى دى نقف مع الناس اللى بتسهر على راحتنا ونساعدهم
وبكدة نكون خلصنا موضوع تسليم الاهالى يارب نكون عرفنا يعنى ايه تسليم أهالى ولما نشوف المجرم نعمل معاه ايه ونتعامل معاه ازاى وإزاى نحافظ على الادله والمسروقات وامته نشهد وايه واجبنا تجاة رجال الشرطة وإزاى نساعدهم
محامى الغلابه
مشرف القسم القانونى
للمزيد من مواضيعي
سلسة حقك وواجبك الجزء الخامس ( تسليم الاهالى)
العرض العادي
