السلام عليكم ورحمه الله وبركاته
ازيكم جميعا
النهاردة هنتناول قضيو هامة ألا وهى قضية إيصال الامانه
كل واحد مننا ممكن يروح يشترى حاجة من محل وعاوز يعملها بالتقسيط الراجل صاحب المحل يقوله اكتبلى وصولات أمانه صح الكل بيحصل معاه الكلام دة ...
طيب تعالوا بينا نقعد مع بعض اخوات ونشوف يعنى ايه وصل امانه بعد عن الالفاظ القانونية والكلام دة كله :
إيصال الامانه أو وصل الامانه زى ما الناس بتقول هو باين من اسمه ان واحد بياخد فلوس من واحد علشان يوديها لواحد تانى الاول بياخد عليه وصل علشان يضمن انه يودى الفلوس للتانى تمام بكل سهوله واحد بياخد فلوس علشان يوصلها وبيمضى على إيصال امانه
طيب امته تبقى جريمة وايه اسم الجريمة دى ؟
الجريمة دى اسمها تبديد مبلغ الايصال واختلاسه لنفسه يعنى واحد واخد فلوس وأخدها لنفسه موصلهاش لصاحبها طيب امته نقول ان دة اختلس فلوس لنفسه
أول حاجة ان يكون الشخص دة استلم الفلوس علشان يسلمها لواحد تانى .
تانى شىء انه يكون موقع على ايصال امانه تثبت به حقك
التالته بقى انه يختلس الفلوس دى لنفسه يعنى ياخدها ميسلمهاش ويخون الامانه
طيب الوقتى انا رحت علشان أشترى ثلاجه مثلا والراجل مضانى على إيصال امانه ليه ؟ هو لا إدانى فلوس أوصلها لحد ولا غيره ؟
أقولك هو بيمضيك على إيصال الامانه حاجة تانية غير دينك الاصلى لان ايصال الامانه اسرع فى طريق رفعه إنما لو عمل كمبياله مش هتنفع لان الكمبياله التعامل بها بين التجاريين وفى المعاملات التجارية والشيك واقف من زمان زى ما احنا عارفين .
طيب بس هو مش إدانى فلوس علشان يرفع عليا قضية انى أخدت منه فلوس ؟
الراجل بيعمل أيسر الطرق لانه ياخد حقه منك بسرعه فبيمضيك على إيصال أمانه .
طيب انا مثلا مديون له ب500 جنية ومش سددت هو إشتكانى بمبلغ 50000 ج ليه ما يشتكينى ب500ج بس ؟
أقولك ليه ودى نقطة فى شغل المحامين ياريت الكل يفهمها ليه المحامى أو صاحب الفلوس بيمضى الايصال على بياض وبيحط فيه مبلغ كبير
لان القاضى لما يشوف الايصال هيبص فيه وهيشوف المبلغ وهيحكم على اساس المبلغ الموجود انا مثلا لو مديون بمبلغ 500ج القاضى ممكن يحكم علي المتهم بشهر حبس دا يكون فى أول درجه هيعارض وهينزل العقوبة مثلا لاسبوعين ممكن يروح ينفذ الحكم ويعمل حاجة اسمها نقض فى الحكم ويبقى بكدة ضيع حق الراجل لان النقض بيقعد 6 أو 7 سنين يبقى بعد المدة دى ياخد الراجل فلوسة
طيب المحامى لو كاتب الايصال بمبلغ 50000ج الحكم ممكن يكون سنتين أو ثلاث سنوات يعنى صعب انه يفكر ينفذ فبيضطر انه يروح يعطى للراجل فلوسه وبكدة حق صاحب الفلوس مش تضيع
انا حبيت أوضح لكم النقطة دى علشان الكل يعرفها لان كتير من الناس بيقول انا مديون بمبلغ 1000ج مثلا والناس بيشتكونى ب100000ج ليه انا مش عليا الفلوس دى كلها دا يا جماعة السبب اللى حبيت الكل يعرفه علشان الحقيقة تبان إدام الناس والكل يفهم ليه إيصال الامانه بيكون بمبلغ أكبر من الدين الحقيقى
مع خالص إحترامى
محامى الغلابه
للمزيد من مواضيعي
إيصال أمانه ب100000 جنية
رد: إيصال أمانه ب100000 جنية
العرض العادي
