خدي بالكِ من كلامكِ .. ماتعرفيش أنهي ودان بتسمع لكِ!

رنا المصرى · 08-19-2010, 08:40 PM

أولا يعني ايه عنوان الموضوع؟

دي نصائح للبنات .. كلها بتصب في أنها تاخد بالها من كلامها لو اضطرت تكلم رجل أو حتى في أي تعامل مع الناس
وبنهدف به أننا نوصل لصورة البنت الحيية الطيبة اللي ربنا سبحانه وتعالى يحبها و يرضى عنها

ليه بنقول للبنت خدي بالكِ من كلامكِ ومش بنقولها للولد؟

ربنا سبحانه وتعالى قال:

" إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا "

فربنا وجه صيغة الأمر للنساء مش للرجال

والنبي صلى الله عليه وسلم حذّر من فتنة النساء مش من فتنة الرجال

(1)
لازمات البنات

ساعات كده بيكون للبنت "لازمة" في كلامها

هي مش قاصدة تتدلع... لكن هي تلقائية وبتقولها كده

مثلا تقول: أنا بحب البتاع الصغنوني أو الصغنتوتي ده

البنوتة دي طيوبة و بيوضة

أو مثلا لما تتعجب من حاجة تقول: اهااااااا اممممم

وحاجات كده كتير أكيد عارفينها مش هينفع أكتبها

الاشكال طبعا مش في أنها تتكلم بها مع صاحباتها البنات

لكن تاخد بالها من كلامها وماتدخلش كلمة من الكلمات في كلامها مع رجل غريب من غير ما تقصد.

(2)
أصوات البنــات في التليفونات

ولنا معها وقفتين:

* مثلا هترد على تليفون

بلاش كلمة الووووو ايوااا مين معااايا

لكن يكون الكلام "مقتضب" يعني تختصري في حروفه على قدر الامكان

الو 3 حروف .. يبقى بلاش الووو اللى 5 حروف

بالذات لأن حروف المد بتطول ماتعرفيش أنتِ وقفتيها فين

لكن خير الكلام: السلام عليكم

أولا بتاخدي عليها ثواب 10 حسنات ولو كملتيها لآخرها 30 حسنة

ثانيا الكلمة دي مباشرة بتعطي إحساس للي هيرد أن اللي بترد دي بنت محترمة

ثالثا كأنكِ بتتقي شر اللي هيتصل (لو كان واحد مش كويس) بأنكِ ألقيتي عليه السلام وطلبتي منه الأمان

* صحيتي من النوم على صوت تليفون

لو حسيتي أنكِ لسه مش فايقة وهتخرّفي : ) في المكالمة
الأفضل ما ترديش
كمان صوتكِ وأنتِ صاحية من النوم بيكون لسه تقيل وعقبال ما بتجمّعي الكلام وتاخدي

أنفاسكِ ... كل ده ما تعرفيش الشيطان بيلعب في دماغ المتصل ازاي !!!

(3)
البنات و المواصلات

ملحوظة مهمة جدا المواصلات دي أجرة مش ملاكي

يعني مش ينفع أخد راحتي في الكلام والضحك فيها

في 26 ودان غيري بتسمعنى لما باتكلم .. بالذات لو كانت العربية 14 راكب

لو أنتِ عايزة توقفي السواق عشان تنزلي

لو بقى قاعدة ورا خالص

إما تقوليها مرة واحدة "على جنب " بصوت واضح و جامد

أو لو شايفة قدامك راجل محترم وتستشفي أنه بيساعد قولي "على جنب" بصوت عادي بين

البينين بحيث يتطوع الرجل ده وينادي بدلا عنكِ

(4)
البنات و أصحاب المحلات

ساعات بنقابل نماذج غلسة من البياعين.. يفضل واقف لكِ وأنتِ بتشتري الحاجة...وكل شوية

عايزة حاجة يا آنسة!

فأنتِ لو عايزة حاجة.. أو مجموعة حاجات... جمعي الحاجات مع بعضها بكل تفاصيلها وقوليهم له على مرة واحدة

بلاش كل شوية تناديه أو تفضلي تسأليه عن تفاصيل حاجات مش هتشتريها أو تفاصيل عموما مالهاش فايدة

زي مثلا واحدة عمالة تسأل البياع : هو انتو اللي فاتحين فرع في منطقة كذا؟
أصل أنا شفت محل هناك بس مخدتش بالي

فخدي بالكِ..

لأنكِ كل ما تفتحي سكة كلام هيفتح لكِ هو 10 سكك

وابحثي عن بنت بتشتغل في المحل عشان تبقى أسهل في الأخذ والرد معاها ... بالذات أن

بعض البياعين خلقهم ضيق

yasmina · 08-19-2010, 10:00 PM

موضوعك عسول خااالص يا رنا بجد عجبنى اووى ..

ان شاء الله كل البنات يستفيدوا منك ..ومستنيين بقية النصايح الحلوة دى..

تسلمى حبيبتى على الموضوع ..

معلش اسمحيلى هانقله منتدى البنات..

اسلام فياض · 08-19-2010, 11:11 PM

موضوع جميل انا فضولى وحبيت ادخل
معلش
تحياتى

مجاني · 08-20-2010, 12:24 AM

ربنا سبحانه وتعالى قال:

" إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا "
صدق الله العظيم ...

اولا حمدالله ع السلامه يا رنا ..

ثانيا .. ياريت تنتقل عوي الصلاح والاخلاق الحميده والتأدب بأداب الاسلام بيننا .. كما ينتقل غيرها ...

بارك الله في شبابك عملك

~~برنسيسة المنصورة~~ · 08-20-2010, 12:42 AM

علم وجااااااااااارى التنفيذ ان مكنشى اصلا بيتفذ موضوع جميل تسلم علية

روعه · 08-20-2010, 06:13 PM

جميل الموضوع رنا تسلم ايدك يا قمر

للمزيد من مواضيعي