للمزيد من مواضيعي

 

الموضوع الأصلي : اذا كنت صريح اكتب 3 من عيوبك? وف اى وقت تظهر؟     -||-     المصدر : مدينة المنصورة     -||-     الكاتب : zOka

فى البداية مشكور لموضوعك بداية موفقه باذن الله وانا شايفة انه حاجة مش وحشه اننا نكون عارفين العيوب اللى فينا ونعترف بيها عشان يمكن نقدر نغيرها او نقلل من حدتها وهى مش شجاعة اد ما هى تصالح مع النفس وعيوبى هى التردد لما بكون مطلوب منى اخد قرار معين والنرفذة اوقات لما حد يستفزنى وطبعا العيوب بتظهر اوقات ما لكن مش دايما

موضوع جميل

عيوبى لما بتعصب بكون وحش ومش بحب أتكلم ومفيش حد بيعرف يكلمنى أصلا

بحب أسكت كتير

عصبى

" اكيد الكمال لله وحده واكيد كل واحد فينا فيه عيوبه ودى حاجه مش عيب لأن زى ماقولت الكمال لله وحده"
وبصراح من عيوبى :
1/ معنديش طولة بال وبتنرفز بسرعه خاصه لما يكون اللى قدامى مش فاهمنى بتعصب.
2/ شغلى اهم حاجه عندى ... ممكن تفكروا ان ده مش عيب بس انا ممكن اجى على نفسى وعلى صحتى علشان شغلى.
3/ بزهق بسرعه وبحب التغيير.

مشكور اخي علي موضوعك الجميل ... دمت بخير

عيوبي ..
مغضاب ... متمرد ... اشعر بالملل بشكل مؤذي ...

رائع جدا الشجاعة دي و الانفتاح اللي بين الاعضاء ده
انا مبسوط جدا بجد بروح الاخوة الموجودة
علشان كده ليكوا مني هدية حلوة اوي علشان شجاعتكم
لكل واحد قال انا بغضب - عصبي - متوتر - قلق - مغضاب - بتنرفز
اكيد كل واحد قال على صفة مش حلوة فيه اكيد نفسه يغيرها صح؟ ولا لا ؟
انا سامع ناس بتقول مش فارقة !!! وسامع ناس بتقول انا عاجبني نفسي كده علشان بخوف اللي ادامي و بسيطر عليه !!!! فدول باه للاسف عندهم مرض عضال لازم يحسوا بيه الاول.
اما اللي حاسين بالمشكلة و عارفين اضرارها و سلبياتها عليهم فدول باه اللي ليهم الهدية الكبرى
لو كنت فكرت و خدت القرار ابدأ معايا
بجد حاول تتبع معايا النصائح البسيطة دي
1- التنفس الاسترخائي : ابحث عنه في الانترنت و استمتع بتغيير حياتك
2- اكثر من شرب الماء
3- اكتب في ورقة هذه الصفات و قطعها ثم اكتب في ورقة اخرى الصفات المضادة لها بصفت الحاضر مثال:
انا عصبي جدا انا هادئ جدا حاليا و اشعر براحة كبيرة
انا متوتر انا متزن نفسيا
انا غير قادر على التحكم في اعصابي انا قادر على التحكم في اعصابي
فائدة التمرين:
العقل اللاوعي يستجيب فقط لما تردده عليه فعندما تقول:
انا عصبي و ترددها اكتر من مرة + مشاعر سلبية + تصرف سلبي النتيجة اعتقاد يرسخ في العقل الباطن انك كذلك
و العكس بالعكس
لو شايف ان الموضوع يستاهل و انه هيفرق معاك ومع اللي حوليك توكل على الله
كلها حجات مش هتكلفك ولا مليم بس خد القرار دالوقتي و ابدأ مرة واتنين و تلاثة

حلو يا شريف ردك على الموضوع انا اعرف ان الميا والتنفس باسترخاء بتهدى لما تكون متعصب لكن اكتب واقطع دي اول مره اعرفها لكن انا مثلا حصل معايا حاجه غريبه ..انا نادرا ما انسى حاجه ماعدا الاسامى .. فمش بضطر اسجل حاجه عشان افتكرها بس في مره معرفش ليه قلت انا هنسى الموضوع ده فلازم اسجله مع ان معاده بكره يعنى مش بعيد ... تعرف نسيت اسجله ونسيته اصلا
فلو انت مش بتنسى وقعدت تقول لا انا هنسى ومصر عليها هتلاقيك فعلا نسيت ... عشان كده انا مصدقه ان العقل الباطن فعلا بيستجيب لافعالنا ..... ربنا يهديهولنا بس ويستجيب للحلو هههههههه

سوري انى علقت على رد مفكر قبل مشارك في الموضوع اعذرونى ... شكرا يا زوكا على الموضوع حلو وجميل
عيوبي امممم ... مش فاكره يمكن من كترها مش عافاها ... بس بعرفها لما حد يقولى حاجه بتدايقه فيا

يعنى مثلا لما ازعل ببقى كئيبه ومنطويه بشكل يخلى الناس تتخنق منى رغم انى ببقى بعيده اصلا عنهم بس كتومه بشكل ينرفز ورغم كده لما اهدى خلاص باجى واحكى الموضوع كانه حاجه عاديه ويمكن يتحل كمان ... بس بحس وقتها ان محدش بيقدر الموضوع الا الى عايشه فاحكى او محكيش مش هتفرق عشان كده بفضل انى احتفظ بيه

تانى حاجه اوقات بحس ان معنديش حسن تصرف يعنى ممكن ادخل في حاجه عشان اصلحها الاقينى لخبطتها رغم ان نيتى بتبقى سليمه ومع ذلك لو لقيت صد او هجوم او رفض حتى مع انه وارد جدا بزعل واتمص واطلع بره الموضوع بسرعه بهرب يعنى بس بروق بردو بسرعه وانسى الى حصل كانه مكنش

التالت وده الى خانقنى معنديش موازنه في حياتى يا ابيض يا اسود ... يعنى طيبه يبقى طيبه بهبل بعبط من غير حدود مع انى عارفه ان ده غلط بس مش بعرف اتحكم فيه ولما اقفل خلاص ببقى صعيديه معرفش اسامح بسرعه وخصوصا لو شخص عزيز ويمكن اجرح كمان من غير مراعى الى فات مش بس اكتفى بعدم المسامحه عارفه ان انا كده غلط بس اعمل ايه في نفسي ... قياسا كده على كل التضادات الى في حياتنا

مش عارفه ايه تانى بس لما اعرف حاجه جديده هقولكم والى يكتشف حاجه يقولى عشان بحاول اصحح من نفسي

اتمنى مكونش طولت عليكم ورغيت كتير .. اشوفكم على خير

طبعا بنشكر زوكا اللي فتح موضوع جامد جدا ممكن يكون مدخل كويس لحجات حلوة

طيب انا هستنى مشاركات اكتر و استتوا مفاجآت اكتر وكمان معلش هسيب نفسي للآخر لاني عندي عيوب كتيييييييييير و عايز حد يشاركني في حلها
لي ملاحظة صغيرة لسه ما وضحتش اوي هقولها بعدين فكروني بس.
بحبكم

اختي روعة تحياتي
التردد علاجه الثقة بالنفس
النرفذة علاجها الثقة في الاخرين و حبهم
اسالي نفسك سؤال ايه هو اصلا اللي انا عايزة اخد فيه قرار ؟حدديه في جملة واضحة ومفهومة.
اسالي نفسك مجموعة اسألة ليه؟
س1-ليه انا عايزة اعمل كده؟
ج1- علشان ....
س2- اشمعنى..؟
ج2-علشان...
س3 - ليه برده...؟
وافضلي كده لحد لما توصلي لجوهرالموضوع
ايه اسواا حاجة هتحصل لو عملته ايه اسوا حاجة هتحصل لو معملتوش
ايه احسن حاجة هتحصل لو عملته ايه احسن حاجة هتحصل لو ما عملتوش
خدي قرار
ضعيه في الفعل
قيمي نتائج القرار
عدلي السلبيات
ارجعي مرة تانية ضعيه في الفعل
ينطبق الكلام السابق على كل قول او فعل تريدين القيام به كل فعل او رد فعل
ياريت يكون كل الكلام ده بشكل مكتوب لو الموضوع كبير زي جواز او قرار مصيري اما لو موضوع بسيط ممكن بسرعة تفكري في الاسئلة دي في عقلك وتخدي القرار بعد الاستخارة طبعا.

أخي محمي الغلابة
بصراحة هل تشعر أحيانا بانك مبسوط من حالة العصبية اللي بتكون عليها علشان بتديك باور (طاقة) وشخصية ادام الناس؟؟