هدوشكوا شوية معلشى بس اعذرونى الفترة اللى فاتت منعتنى من الكتابة وبحاول اعوض
حاولت تكتشف نفسك ؟؟؟؟
كل إنسان بيتولد .. و بيفضل عايش طول حياته .. عشان يكتشف نفسه
يجرب حاجة ويفشل فيها ، مش مهم يكمل على قد ما مهم انه يدرك ويتاكد اذا كان هو ده الشئ اللى هيسعده لما يحققه ولا لأ ؟؟ ..
ممكن يحاول ويفشل .. ويحاول تانى ويجتهد ويسعى وبرضه يفشل .. ويحاول للمرة المليون .. وفى الاخر ينجح .. ،
لكن للاسف لما بينجح بيبقى مش سعيد ..
ويكتشف فجأة ان مش الحاجة دى اللى كان بيدور عليها .. ولا قدر لما حققها انه يكون سعيد !
معنى كده ان مهم اوى اوى .. وهفضل اقول اوى من النهارده للصبح .. اننا نحدد فى البداية ، احنا عاوزين ايه ؟؟
بنحب ايه ؟؟ ايه اللى هنقدر نبدع فيه ؟؟
وبعد ما تحدد اختبر اختيارك .. اسأل نفسك .. ( ايه اقصى طموح عاوز اوصله فى المكان ده ؟؟ )
هتجاوب .. وبرضه تختبر إجابتك وتسأل نفسك اهم سؤال فى الموضوع كله ..
( هل لما اوصل للمكان ده اكيد هكون سعيد ؟؟؟ )
لو كانت اجابتك .. طبعا .. يبقى إتكل على الله .. انت كده حددت وجهتك صح .. ناقص بس تشوف انت محتاج ايه فى طريقك ..
يعنى شوية مهارات وامكانيات هتساعدك .. ارسم طريقك وابدأ وربنا معاك .. هتوصل يعنى هتوصل ..
ولو موصلتش حتى هتكون ماشى فى طريق بتحبه وهتكون مستمتع اوى بيه .. وهو ده المهم ..
هو ده الموضوع .. هو ده النجاح الحقيقى .. انك تستمتع بالطريق .. بالحياة
اما بقى لو سألت نفسك نفس السؤال .. اللى هو ( هل لما اوصل للمكان ده اكيد هكون سعيد ؟؟؟ ) .. وكانت إجابتك .. لأ ..
او لقيت نفسك بتفكر كتير وبتاخد وقت عقبال ماتجاوب .. يبقى اوعى ..
اوعى تبدأ وتاخد اى خطوة .. إلا لما ترجع تانى وتكتشف نفسك .. وتعرف انت عاوز ايه ؟ بتحب ايه ؟ نفسك فى ايه ؟؟ ..
لانك لو بدأت وانت مش محدد انت رايح فين بالظبط .. يبقى هضيع منك وقت كبير اوى ..
يمكن كنت هتقدر تستمتع بيه لو من الاول حسبتها صح ..
انا شخصيا بستمتع باللعبة دى اوى .. مؤمن جدا ان حياتى كلها عبارة عن وقت بكتشف فيه نفسى ..
بدخل فى كل شئ وبجرب .. لانى مقتنع ان كل إنسان فيه حجات مايعرفهاش عن نفسه ..
اعمل اللى انت عاوزه .. اللى هيبسطك .. استمتع بالطريق ..
لانك متعرفش هيخلص امتى .. وافتكر ان كل انسان بيتولد وبيفضل عايش طول حياته ..
(عشان يكتشف نفسه )
للمزيد من مواضيعي
نفسه يكتشف نفسه
رد: نفسه يكتشف نفسه
العرض العادي
